Horroris auctor quis fuit, osseam

Qui primus olim pinxit imaginem,

Sic imminentis clariorem

Notitiam ratus esse Mortis ?

Non is futuri, non habuit status

Praesentis huius, credo, scientiam,

Quantumque distarent caducis

Certa bonis, genuina falsis.

Tu pinge, si vis pingere, simplicem,

Figmenta cui sint nulla, coloribus

Fucisque sublatis, genarum,

Quo pateat tibi Mors, figuram.

Fastidiosi Judicis aut Heri

Vultum carenten pinge gravis nota;

Cuiusque non ardet Voluptas,

Ira tumet, rubet ore Fastus.

Hanc esse formam terribilem putas

Horrore tanto? Di facerent, parem

Vivi referremus! reperta

Vita foret melior qiete.